ໂດຍ : ວິເສດ ສະແຫວງສຶກສາ
ມື້ນີ້ຜູ້ຂຽນໄດ້ສັງລວມເອົາບັນຫາສໍ້ລາດບັງຫລວງທີ່ເກີດຂຶ້ນຢູ່ບາງປະເທດ
ເພື່ອເບິ່ງນຳ ກັນວ່າຢູ່ບ້ານເພິ່ນເມືອງທ່ານນັ້ນ ເຂົາມີວິທີແກ້ໄຂແນວໃດ. ບັນຫາເດັ່ນດັງທີ່ເຮັດໃຫ້ລັດຖະບານອົດສະຕຣາລີສັ່ນຄອນຫວ່າງບໍ່ເຫິງມານີ້
ໄດ້ແກ່ຄະດີສໍ້ລາດບັງຫຼວງຂອງລັດຖະມົນຕີກະຊວງສາທາລະນະສຸກອົດສະຕຣາລີ ຊື່ທ່ານ ນາງ
ຊູຊານ ລີ (Sussan
Ley) ເຖິງຂັ້ນຜູ້ກ່ຽວຕ້ອງໄດ້ຍົກທຸງຂາວລາລົງຈາກຕັ່ງລັດຖະມົນຕີ.
ຂ່າວກ່ຽວກັບບັນຫານີ້ ບອກວ່າ: ທ່ານລັດຖະມົນຕີສາ ທາລະນະ
ສຸກຖືກກ່າວຫາ ແລະ
ວິພາກວິຈານຢ່າງຟົດເດືອດວ່າ ໃຊ້ເງິນພາສີຂອງປະຊາຊົນເພື່ອຜົນປະ ໂຫຍດສ່ວນຕົວ ຄືໄດ້ໃຊ້ຈ່າຍງົບປະມານໃນການເດີນທາງສ່ວນຕົວລວມທັງການເດີນທາງໄປເມືອງທ່ອງທ່ຽວໂກນຄົດ
(Gold
Coast) ເພື່ອຊື້ທີ່ພັກຫລູຫລາລາຄາແພງໃນປີ 2015. ໃນການປະກາດກ່ຽວກັບການລາອອກຂອງທ່ານນາງ
ຊູຊານ ລີ ນັ້ນ,
ທ່ານນາຍົກ ມານ ຄອມ ເທີນບູນ ໄດ້ໃຫ້ຄຳໝັ້ນສັນຍາວ່າ:
ລັດຖະບານຈະສ້າງຕັ້ງໜ່ວຍງານຕິດຕາມກວດກາການໃຊ້ຈ່າຍຂອງສະມາຊິກລັດຖະສະພາໃນອະນາຄົດ.
ທ່ານນາຍົກໄດ້ກ່າວເສີມວ່າ: ຊາວອົດສະຕຣາລີມີສິດຕິດຕາມກວດກາການໃຊ້ຈ່າຍຂອງບັນດານັກການເມືອງ
ເຊິ່ງໄດ້ມາຈາກເງິນຂອງຜູ້ເສຍພາສີ ເພື່ອເຮັດໃຫ້ການໃຊ້ຈ່າຍຖືກຕ້ອງ, ມີປະສິດທິຜົນ, ສອດຄ່ອງກັບຈັນຍາບັນ. ຕໍ່ຈາກບັນຫາຂອງທ່ານລັດຖະມົນຕີກະຊວງສາທາລະນະສຸກແລ້ວ
ກໍມີເລື່ອງຂອງລັດຖະມົນຕີກະຊວງການເງິນເປັນເງົາຕາມມາ ອັນໄດ້ເຮັດໃຫ້ທ່ານນາຍົກອົດສະຕຣາລີປວດຫົວເຂົ້າຕື່ມ
ນັ້ນຄືບັນຫາທ່ານ ມາທຽດ ຄໍ ມານ (Mathias Cormann) ລັດຖະມົນຕີການເງິນທັງຄວບຕຳແໜ່ງລັດຖະມົນຕີຄຸ້ມຄອງ ການໃຊ້ຈ່າຍຂອງລັດຖະສະພາ
ທີ່ຖືກກ່າວຫາວ່າໄດ້ໃຊ້ຈ່າຍເງິນປະຊາຊົນຜູ້ເສຍພາສີຈຳນວນ 17.000 ໂດລາສະຫະລັດ ເພື່ອເດີນທາງໄປທ່ອງທ່ຽວຫລາຍຄັ້ງທີ່ເມືອງຊາຍຝັ່ງບຣູມ
(Broome)
ໃນວັນພັກທ້າຍອາທິດ. ຄຳກ່າວຫາຍັງໄດ້ສືບສາວທາວກັບຄືນໄປຮອດປີ
2013 ເວລາທີ່ທ່ານ ຄໍມານ ໄດ້ເດີນ ທາງໄປຮ່ວມຊົມກິລາເຕະບານນັດຊີງໄຊຂອງ AFL ໂດຍມີຜູ້ອຸ ປະຖຳປີ້ຍົນລ້າ ກໍຄືການຕ້ອນຮັບຂັບສູ່ເປັນຢ່າງດີ.
ແຕ່ບັນຫາໃຫຍ່ກັບທ່ານແມ່ນເກີດຂຶ້ນໃນປີ 2014. ໃນປີນັ້ນ, ທ່ານ ຄໍມານ ໄດ້ໃຊ້ຈ່າຍເງິນຫລາຍກວ່າ 17.000 ໂດລາສະຫະລັດ
ເພື່ອເປັນຄ່າເດີນທາງ 5 ຄັ້ງໄປບຣູມ ເຊິ່ງເປັນເມືອງແຄມຝັ່ງເບື້ອງຕາເວັນຕົກຂອງອົດສະຕຣາລີ.
ໜຶ່ງ ໃນ 5 ຄັ້ງຂອງການເດີນທາງນັ້ນ ລວມທັງສະມາຊິກຄອບຄົວ ເຊິ່ງຕ້ອງໄດ້ໃຊ້ຈ່າຍເງິນຈຳນວນ
5.000 ໂດລາສະຫະລັດ. ໂຄສົກປະຈຳຕົວຂອງທ່ານ ຄໍມານ ອອກມາອະທິບາຍຕອບໂຕ້ສຽງ
ວິພາກວິຈານຂອງສັງຄົມວ່າ: ທ່ານ ຄໍມານ ເປັນສະມາຊິກສະພາສູງຈາກເຂດເລືອກຕັ້ງຕາເວັນ ຕົກ.
ດັ່ງນັ້ນ ຈຶ່ງຈຳເປັນຕ້ອງໄດ້ເດີນທາງໄປພົບປະກັບຜູ້ມີສິດເລືອກຕັ້ງ ແລະ ບັນດານັກທຸລະກິດຂັ້ນນຳໃນທົ່ວລັດ
ແລະ ວ່າ ການໃຊ້ຈ່າຍທັງໝົດນັ້ນ ສອດຄ່ອງກັບລະບຽບການ ແລະ ໄດ້ມີການແຈ້ງຢ່າງລະອຽດໃນທຸກໆຄັ້ງ.
ເລື່ອງສຸດທ້າຍທີ່ຢາກເວົ້າປິດທ້າຍກໍຄືບັນຫາລັດຖະບານຣຸຍມານີກຽມອອກກົດໝາຍກຳນົດຫລັກການອະໄພຍະໂທດສຳລັບນັກໂທດຄະດີສໍ້ລາດບັງຫລວງ, ແຕ່ສຸດທ້າຍກໍໄດ້ໂຈະໄວ້ກ່ອນຍ້ອນເກີດມີການປະທ້ວງຮ່າງກົດໝາຍດັ່ງກ່າວ.
ຈຸດທີ່ສ້າງກະແສຄວາມບໍ່ພໍໃຈກໍຄືບ່ອນທີ່ກົດໝາຍກຳນົດວ່າ: ພະນັກງານນັບແຕ່ຊັ້ນຕຳແໜ່ງນາຍບ້ານຫາຂັ້ນລັດຖະມົນຕີທີ່
ຕິດຄະດີສໍ້ລາດບັງຫລວງໃນມູນ ຄ່າບໍ່ເກີນ 48.500 ໂດລາສະຫະລັດນັ້ນ ມີສິດໄດ້ຮັບອະໄພຍະ
ໂທດ. ພວກປະທ້ວງມີຄວາມເຫັນວ່າ: ປະຊາຊົນທຳມະດາສາມັນຂອງຣຸຍມານີນັ້ນຕະຫລອດຊີ
ວິດຍັງອາດຫາເງິນບໍ່ໄດ້ເຖິງ 50.000 ໂດລາຊ້ຳ, ຊາຫຍັງພະນັກງານລັດຜູ້ທີ່ໃຊ້ໜ້າທີ່ຕຳແໜ່ງ ແຫບເງິນຈາກງົບປະມານຂອງລັດ.
ທັງໝົດທັງປວງແມ່ນເລື່ອງທີ່ເກີດຢູ່ບ້ານເພິ່ນເມືອງທ່ານທີ່ຄວນເບິ່ງໄວ້ເພາະສະໜາມຮົບ
ຕ້ານການສໍ້ລາດບັງຫລວງ,
ການໃຊ້ຈ່າຍຟຸມເຟືອຍຢູ່ບ້ານເຮົາພວມເດີນດີໃນບາດກ້າວຫົວທີນີ້.
No comments:
Post a Comment